Гәдүр ҹофој дәс “ Әҝәр јә кук ә бирәји бәбә чум докундҝә, у бирәји бәбә јә вор дү пуф имбу, вир имбу.” Ки миданү ҝуфтирә ки, һистими әзуни бәбә ⱨәјил хүштәрә ә ҹофо кәширә хутә нәсоху? ... Ихтилот шинирә омори әз данандәһо вә оһилһој ҹәⱨмәт иму. Ә у ҝироштә вәхтһо ә јә кифләт јә кук кәлә бирә. Бәбә чәнгәдә ҹәћти сохтәни ки куку ә ҹофо кәширә хутә бу, хәјрү нәс бирә. Һә дәⱨно зә, донлог сохт, јә чи нә вәдирәмо. Дәдәј әз и тарафиҝә кукә хоши миҝүрд, тимор мисохт вә ә рәћ мидокунд. Салһо ҝироштә - ҝироштә кук кәлә ҹоһил бирәни, дәстәј ћовур - ћәрмәћү амбар бирәни вә бүтүн хәрҹһој хүштәрәш әз бирәји бәбә бәрдә. Һәчи бирәни ки, ә и ⱨәрә бәбә мүфлис бирә вә ә куково сәхт ҝоф сохтәни ки, у һүкмән бијо ә кор вәдарав вә ә хунә пул бијору. Кук ә инһотәво ҝуфтирәни: чүни пул - пул дәшәндәј, мијорум! Сәбәћмиси кук рафтәни әри кор ҝәштә, әнҹәг ћовурһојү бәрдәнүт јүрә әри кејф кәширә. Шәв ә хунә оморәнки дәдәј пурсирәни: әҹи, пул овурдәј? Кук муҝу чү пул, нисти пул. Дәдәј кукә ә тәмизи вәдәшәнү ҝуфтирә әз кисәј хүштә јә пәнҹ монәти( манат - денежная единица в Азербайджане) дорәни ки бәр ди ә бәбәшму. Кук пулә дорәни ә бәбә вә бәбә у пулә вәҝүрдәни дәшәндәни ә пиләтә, сухундәни. Кук ә бивәҹирово дәниширәни вә чарустни рафтәни. Јә кәм вәхт дәдәј кукә һәчи ә рәћ бәрдәни вә бәбә у пулһорә һәммәрә ә пич дәшәндәни, кук һичишә ә вәҹ хүштә нәс вәҝүрдә. Әхирдә јә рӱз дәдәј онд омон сохтәни ки урә дијә имкон нисти әри пул дорә. Чорәј кук бӱррә оморәни, ҝәшдәни вә ҝуҹ бәлорово јә кор офтәни. Шәв вомундә - домундә ә хунә оморәни, гозонҹ сохтиһо сә монәтә ә бәбә дорәни. Бәбә и пуләш дәшәндәни ә пиләтә. Әз кук јә шырынә вәдирәморәни; - тү чү сохтә? зу дәсә дәшәндәни ә гәд аташ вә пулә вәҝүрдәни. Дәсһој хүштәрә бурбундәни ә бәбә: - дәсһојмә гәбәр, кәмәрмә хурд бири әри әни сә монәт. Түрә ә ҹофој мә јозуги нә омо? Бәбә ҝуфти: - Һо..., тә имоһој бәрдәјһо пулһо ән ҹофојтү нәбу ҝуфтирә, түрә јозуги нәс оморәнбу? Кук сәрә гуз ҝүрд вә ⱨәјб хүштәрә ә сәр офто, хәҹәләти кәши. Әз у рӱз бәгдә кук һәр рӱз ә кор вәдәрафт, дәдәј урә ә рәћ докундә әри хубә рӱзу әз Худо лово хост. Корһој бәбәш кәм - кәм ә гојдә офтәрәни, бәрәкәт хунә воҝоштәни ә хунә. Бијојт һәчи ҝујим ки, балаһој һәммә ҹофоһој кәләтәһорә гимәт дорәји, уһо ә кәширә зәћмәтһој кәләтәһо вәрзирәни ҝәрдо. Худо кумәк ә һәммәшму! Геник Исаков Москва. Январь. 2020.
Читайте также
Все материалы рубрики
ИМУҺОЈ, ҺӘРКИМУ 5 ОДОМИНИМ (сәјүмүн һиссә) пәсини,(әвәлү ә сајт СТМЭГИ- “Академия джуури”- “ Рассказы на джуури” 27.12.2019. 05.01.2020.)) Һәммә ћүрмәт хүшдәрә ә иму бурбундә јә кәм пүрүшһо сохдут ә зуһун ҹувури. Иму ә сәр нә офдорә, һә әз јә ҝоф ҝүрдим појисд. Ҝуфдирим хуби, хуби. ⱨәјилһо ди ки, иму зуһун дәдәјимурә ә сәр нәс офдорәним, сәр ҝүрдүт ә уруси ҝоф сохдә ә имурәвоз. Иму һәм мәћтәл бисдорим вә һәмиҝә амбар хәҹәләти кәширим. Һәвәл хәҹәләти кәширим әри әну ки, иму уһорә нә данусдим битәв ҹувоб дорә. 2-мүн мәћтәл бисдорим ә зуһун уруси нә азәрбаҹони ҝоф сохдәј әнуһо. Ҝуфдурут, хәндүсдүт. Оммо, иму ҝәнә һичиш ә сәр нә офдорим. Бәлкә уһо ә иму хәндүсдәнбүрут вә әри хүшдә норәбүрүт ки, ә иму һич нишонәј ҹувури нә вәри. Ә и ⱨәрә әз бирормә муҝум: “Иму чүтами ҹувурим ки, зуһун уруси данусдәним ҝуфдирә әдәјм фурс дорә вә һашдан ки, уһониҝә һичиш насда. Виниш, и ⱨәјилһо ә урусиш, ә азәрбајҹониш әдәт лап хуб ҝоф сохдә. Уһо ә иму рүхшәндиш сохдутҝә ә ҹиҝәјүни”. Хүшдәрә ҝоф дорим ки, зуһун дәдәјимурә чүтам ҝәрәки һәчуш хуб момухим. Ә гәд әни јә мәһ, мә нә бирормә һәм ә хунә, һәмиҝә ә ⱨәрәј ⱨәјилһој гуншиһо дәбирә, јә кәм ҝофһој ҹувурирә вомухдим. Мәһ варасд. Омрим ә Боку ә хунәјму. Әз кәләтәһојму тәвәгә сохдим ки, ә имурәвоз ә хунә һә ә зуһун ҹувури ҝоф сохут. Уһорә әз хоһиш сохдәјму хош омо, имурә гәл ҝүрдә моч сохдүт вә кәләдәдәјму амбар шори сохдә муҝу: “Зуһун дәдәјимурә данусдәҝор у зуһунһојҝәрәш лап хуб мидану. Јәкиҝә кәләбәбәшму чү ҝуфдирәбу јә зуһун данусдәҝор јә одомини, 5 зуһун данусдәҝор 5 одомини” Бовор сохит, ә хунәјму һәммә сәр ҝүрд ә зуһун дәдәјиму ҝоф сохдәрә. Ә гәд јә сал әз дүли ҹуниму фикир дорә лап хуб вомухдим зуһун дәдәјимурә. Кәләдәдәјму әриму хубә ихтилотһо сохдәнбу. Кәләбәбәјму нә бәбәјму әриму ә дәс офдорә китобһој ҹувури овурдүт. Иму хундәрәш вомухдим вә данусдим ки, хәлг имурә хубә шоирһо, нүвүсдәгорһош һисди. Јә чәнд широһој шоирһорәш сәрзуһуни вомухдим. Ә касетһо, ә дискһо вәчирә омориһо мәⱨәниһорә ә зуһун иму шинрәнки имурә һашдан гул гәнәд вәроморәнбу әдәбирим зәрә- вәҹәсдә. Имурә әз Гүбә лап хош оморәнбу. Кәләтәһојму имисалиш бәрдүт имурә ә Губә ә дач. Әз оморәјму јә руз ҝирошдә бәгдә, вадарафдим ә ⱨәрәј ⱨәјилһој гуншиһој ләләјму. Һәммә оморә имурә хош омори сохдут вә сәр ҝүрдүт ћол-әћвол пүрсирә ә зуһун уруси. Иму ә пүрүшһој әнуһо ә зуһун дәдәјиму ҹувоб дорәнки-лап шор бирә имурә тәⱨәриф дорут вә әз иму сог боши ҝуфдурут. Иму дијәш ә јәкирәвоз мәһрибон бисдорим, дусд бисдорим. Дуз јә мәһ хуб рәћәти сохдә бәгдә шәләһојмурә вәгүрдә вәдироморим әз хунә әри вогошдә ә Боку. И дәс, әри имурә рәћ сохдә нәинки ⱨәјилһој мәћәлә, амбара зәнһо нә мәрдһој гуншиһош оморәбүрүт. Һәммәрә әз зуһун данусдәјиму хош оморәбу. Имуш әдәбирим шори сохдә. Имуһој иму, ә 3 зуһун данусдәним ҝоф сохдә. Һәркиму 3 одоми һисоб бирәним. Ә руј һәммә хәндә вобу. Әзу вәхт 2 сал ҝирошдә бәгдә һәмәјму оморим ә Америка. Әҝәр унҹо, ә Боку 3 зуһун данусдәнбиримҝә, инҹо ә Америка ә гәд сә сал 2 зуһуниҝәш вомухдим. Зуһун инҝилиси нә зуһун ивритирә. Иму әз Ирон ә кифләтһој хүшдәрәвоз әри зиһисдә оморәтһо ⱨәјилһој ҹувурһорәвоз дусди сохдәним. Уһо ә зуһун фарси ҝоф сохдәнки, иму уһорә, уһош имурә варасирәни.Әхи, зуһун иму ә фарси, ә күрди, ә тати нәзники. Мәнәј бирормә ә 5 зуһун рәћәт данусдәним ҝоф сохдә. Кәләбәбәјму чү ҝуфдирәбу: “ИМУҺОЈ, ҺӘРКИМУ 5 ОДОМИНИМ!” Рашбил бен Шамај әз китоб “Зиндәҝуни нәгүли”