Нун ҹофој ән дәс.
Нун ҹофој ән дәс.
Ә у ҝироштә вәхтһо һәчи рәвајәт мисохдүт ки, ә јә дурә диһ јә косибә күлфәт зивистәнбу. Кәләтәј хунә әз у сәћәри ә кор мирафт, шәћәнҝум ә хунә моҝошт. Рӱзбәрӱз кор офтә чәтин бисто вә и косибә мәрд ә күлфәт хүштәрәво ћололбу сохтәни, рафтәни ә јә шәһәриҝә әри кор ҝәштә. Ә ⱨәдәти ҝиро әри ҝор офтә һәммә әвәл ә базар сәр кәширә. И косибиш ә базар оморәни, әз сәбәћ тә шәв ҝәштәни, кор нәс офтә. Пишој әз базар вадарафтә шинирәни, киниҝә јүрә ә нумәво һорәј зә. Домундәни ә хүштә; ә и гәрибә шәһәр ки бијо шиноху јүрә? Сәрә тик ҝүрдәни, дирәни јә јәрәшүглүјә мәрд- имбу әз салһојү- појисти ә пишојү әдәј пүрсирә: — тү мәрә нә шинохти? Косиб ҹовоб до муҝу - нәⱨ.
— Тү кук филонкәс, ә филон диһ зивистәнбири, мә ә түрәвоә ә ⱨәјили ә јә мәћәлә зивистәјм, ә јәки вози сохтәјм. Мә филонкәсүм.
Косиб ҹовоб до - имоһој шинохтум.
И ћовур ⱨәјили һичиш нә пүрсирә муҝу:
— Чүни појистәј ә инҹо, кәш ә мәрәво.
Косибә әз дулү шори ҝирошт; јәгин имоһој мәрә кор имбу муҝу.
ћовур ⱨәјили косибә бәрдәни ә хунәј хүштә, сәр-тәнүрә тәмиз сохтәни, јә хубә стол гиноглуги вокудәни вә һорој зәрәни тонушһо - билишһој хүштәрә.
Ә гәд мәҹлис ихтилот сохтәни чүтәрз иһо ә ⱨәјили ә јәки кәлә бирәтҝә вә имбуруз амбар шори ки ћовур ⱨәјили хүштәрә винири. Әји минволәво јә ћофтә косибә ә хунәј хүштә доштәни. Һәр рӱз ә јә ҹиҝә бәрдәни косибә, ҝәрдундәни, гиноглуги дорәни вә һәмишә шори сохтәни ки, ә ћовур ⱨәјили хүштә әдәј хуби сохтә. Вәⱨдә оморәни расирәни, косиб әри ћүрмәтһој ћовур ⱨәјили амбар разиҝәри сохтәни, лово хостәни вә ћәзүр бирәни әри рафтә.
ћовур ⱨәјили әз хүштә рази пүрсирәни:
— Һәри, хош омо түрә, мә дијә чү митанүм сохтә әри тү?
— Һәр чү митани сохтә әз јә корлә бәгдә, у әз дәс тү ниворов.
— У чүни ки әз дәс мә нәворов?
— Әји чәнд рӱз чү хурдәм, бәрдәм һәммә ән тү бу. Имбуруз уһо вараст, сәбәћ дијә ниимбу. Әри һәр рӱз нун бирәји бијо мәрә кор бу. Әји чәнд рӱз һич нә пүрсири ки мә ә и шәһәр әри чү оморәм. Әз дәстү нә воромо ки әримә јә кор дуз сохи, нун мәрә ә ҹофој дәсмәрәво гозонҹ сохум.
И ихтилот әз пүрүшһој Тиро ә иму һәчи омори расири. Косибә әз мүћнәти, әз тәнҝи - дүләсти вәдәшәндә әз мисвоһој Тиро јәкини. Мисвоһој Тирорә әри ә ҹиҝә овурдә Худо ә пишој һәр кәс овондлүјә корһо раст бијоро.
PS: Ә гувоти ән и ихтилот әз ҝирошдә рӱзһој гәд ҹуһурһо јә кәм ҝоф сохим:
— Һәр рӱз әз сәћәри(тәфәⱨәт нәбу һәминон вә јо зимусту) базар ән Ҹуһурһо- Краснаја Слобода ә одомирәво пӱр бирәнбу. Һәминон әз гирог кәнтһо ингәдә чи оморәнбу ки, чи фурухтәҝорһо молһорә ә дү-сә ҹәрҝә мидәчирүт. Ә базар һәм чифурухтәҝорһо, чивосторәҝорһо, корҝәштәҝорһо вә әри вәхт ҝировундә оморәҝорһош амбар бирәнбу. Әри чи восторә мијомоһо имконлүјә одомиһо чү мисохдүт: әз һәрчү пишо базарә јә бо сәјр мисохдүт, әҹә чү һисти - чү нисти миданүсдүт вә ә и ⱨәрә әри кор ҝәштә оморә косибһорә ә диггәт мәҝүрдүт. Ә тәһминирәво базарирә сохтә варастә бәгдә рәћ хүштәрә әз бинәј јәки вә јо дүдүшү мидәшәндүт, импојүсдүт ћол - әћвол импүрсүрүт вә ә хоһиширәво миҝуфтурүт: — бијо мићилло сохит, мә әдәм тәⱨәди сохтә, зәћмәт нәбуҝә, митанитҝә и зәнбилләһојмәрә ә хунәјму расунит, Худо кумәк ә ишму. Зәнбилһорә мидорүт вә һәлүстү ә киф үшү пул мидәшәндүт вә ә рӱј үшү нәдәниширә зу мичарүсдүт мирафдүт. Һәлә әз и совоји уһорә ә јә бәһонәрәво ә гопу һорәј мизәрүт, миҝуфтурүт; — мәрә вәхт јә имкон нисти, бијо и савзәләһој мәћәләрә вәчиним вә јо хорирә бил зәним, һүзүмһорә ә хәрә дәчиним вә саирә.Шәћәнҝум һәг үшүрә мидорүт, ә хунә ә рәћ мидокундүт. Ә әзини рәћһорәво ә гәд ҹуһурһо ә дү јәки кумәк бирәнбүрүт. Мисвој әну корһо у бу ки, һәр инсон ә ҹофој дәс хүштәрәво јә тикә нун хунәј хүштәрә танү гозонҹ сохтә. И мисвоһорә ә ҹиҝә овурдә әриму әз тараф Худо норә омори.
Имбурӱзинә вәхтиш имконлүјә гәдүрданә кукһој хәлг иму, чәндгәдә ә дәс үшү имкон дәри, әдәт әри ⱨәјилһој ҹәⱨмәт ҹиҝә корһо вокундә вә уһорә ә корәво тәⱨмин сохтә. Худо имконһошүрә зијод сохо.
Нун ҹофој дәс һәмишә ширин бирә. Худо јә тикә нунә әри һәммә ә ⱨәсонтирәво расуно. Худо ⱨиломә саламат сохо. Саламат бошит!
Геник Исаков
Москва. 2020.